Gleðilegt nytt ar!!

jæja þá er árið eiginlega búið. Þegar ég lít til baka og hugsa um allt sem hefur dregið á daga mína árið 2007 þá er það bara alveg heill hellingur. Ég byrjaði til dæmis að vinna á leikskólanum Gullborg, lent í mínum fyrsta árekstri, fór í ógleymanlega ferð til New York, horfði á vinkonu mína og hjálpaði henni að ganga í gegnum erfiðasta tímabil lífs síns :( , byrjaði í sálfræði og kvaddi ísbúðina mína. Sem sagt margt búið að gerast á árinu sem er að líða! Það sem mér finnst samt hafa einkennt þetta ár einna mest er hvað ég kynnst mikið af frábæru fólki :) sem er náttúrulega bara gaman.

Gleðilegt nýtt ár elskurnar mínar og takk fyrir árið sem er að líða.....gangið hægt um gleðinnar dyr og við sjáumst hress á nýju ári!

Ástarkveðjur ;*

Ólöf Tinna

Gleðileg jol :)

Jæja þá eru blessuð jólin alveg að verða komin :) jólaskapið mitt er hins vegar ennþá á leiðinni.....líka frekar erfitt að komast í jólaskap þegar maður er í prófum til 21.des, þeir eru ekki beint að gefa manni langt jólafrí þarna í háskólanum. Ég hélt að ég myndi ekki ná að kaupa allar jólagjafirnar og taka til í herberginu mínu en sem betur fer náðist það fyrir rest :) foreldrum mínum til mikillar ánægju. Ég get verið frekar mikill draslari og herbergið mitt ber þess ávallt merki.
Í gær var þorláksmessa a.k.a skötudagurinn mikli. Ég fór í tvær skötuveislur og gerðist meir að segja svo fræg að fá mér smá skötubita. Afi Þórarinn heitinn var vanur að gera skötustöppu með vestfirskri mör og fannst honum best að hafa skötuna vel kæsta, enda var hann ættaður frá Vigur í Ísafjarðardjúpi. Hefðin er ennþá í fjölskyldunni og verð ég nú að viðurkenna að lyktin er mikið verri heldur en bragðið. Skatan var alls ekki það slæm.

Ég kíkti aðeins í smáralind í gær með Kristínu litlu systur. Hún var að reyna finna sér jólagjöf sem átti að vera frá ömmu Lóu til hennar. Amma Lóa var nefninlega svo sniðug í ár að láta öll barnabörnin bara fá pening til þess að kaupa sér eitthvað. Við þurftum samt að gera það fyrir jól og láta hana fá það svo hún gæti pakkað því inn. Ég fór í Leonard og keypti mér geðveikan hring sem Hendrikka Waege gerði. Ég elska skartgripina hennar!

Gleðileg jól elskurnar mínar og hafið það sem allra best um jólin :)

Ástarkveðjur

Ólöf Tinna

...

Þá er ég hálfnuð í prófum. Búin með tölfræðina og á eftir skýringar á hegðun. Í MR voru að minnsta kosti 8 jólapróf þannig það er frekar skrítið að fara bara í 2 jólapróf. Tölfræðiprófið var bara frekar létt. Ég bjóst við einhverju svakalegu prófi þar sem að kennarinn minn í tölfræðinni er frekar óútreiknanleg. Leiðinlegustu tímar í heimi voru fjórfaldur tölfræðitími á þriðjudögum. Það var afrek út af fyrir sig að halda sér vakandi í þeim. Oft gera kennararnir leiðinlegu fögin bærileg en þessi kennari gerði bara illt verra. Hún er eflaust ágæt en í kennslustofunni gaf hún lítið sem ekkert af sér.

Ég skellti mér áðan í jólaklippinguna enda kominn tími til að fara í klippingu. Fór síðast í maí minnir mig. Svona er þetta þegar maður er með sítt hár....minna viðhald. Ég er búin að fara núna nokkrum sinnum til Gosa á rauðhettu og úlfinum. Mér finnst hann alveg frábær klippari og hann gerir bara akkurat það sem maður biður hann um að gera. Ég er ennþá soldið brennd eftir hörmungina sem ég fékk hjá Svavari hérna um árið. Endaði með drengjakoll, gulrótarrautthár og hvítarstrípur. Ég leit út eins og fertug kona takk fyrir.

Ég og Sigga erum búnar að kaupa miðana okkar til London. Duttum niðrá eitthvað svakalegt tilboð þannig að allt heila klabbið kostaði bara 17.000 kall. Bara jafn mikið og ég borgaði fyrir flugið mitt til eyja um síðustu verslunarmannahelgi en beilaði svo á.
Mamma og pabba voru reyndar svo elskuleg að gefa mér flugið :) þannig ég þarf bara að borga hótelið og svo náttúrulega miðana á Spice girls.

heyrðu ætla að drífa mig í ræktina.....þar til næst

ástarkveðjur Ólöf Tinna

Hann a afmæli i dag.....

hann á afmæli í dag,
hann á afmæli hann Villi,
hann á afmæli í dag.

Veii.....til hamingju með daginn elsku Villi minn! :)

London baby!

Loksins, loksins er jólasnjórinn kominn :) núna þýðir ekkert annað en að dusta rykið af þoturassinum sínum og skella sér upp í Plútó brekku. Nei kannski er ég orðin aðeins of gömul í það ;)

Ég byrjaði á átaksnámskeiði hjá jsb í byrjun nóv. Fékk bara allt í einu ógeð af þessari leti í mér. Ég var ekki búin að hreyfa á mér rassgatið í ár og át bara allt sem mér langaði í. Ég fer núna svona 3-5 sinnum í viku í ræktina og er búin að breyta mataræðinu algjörlega. Þetta er búið að vera soldið erfitt en vel þess virði. Ég verð komin í flott bikiní form næsta sumar ;)

Ég, Sigga og Villi erum að fara til London 12.jan á Spice girls tónleika. Vá hvað það á eftir að vera gaman!!! Fyrsti geisladiskurinn sem ég keypti mér var með Spice girls þannig þetta á svo sannarlega eftir að rifja upp gamla og góða tíma! Í janúar eru útsölur í London þannig það verður líka eitthvað verlsað og auðvitað djammað.

Jæja best að fara læra... bæjó!

oloftinna.blogspot.com :)

Jæja þá lét ég loksins undan pressu og stofnaði bloggsíðu :) fyndið hvað maður finnur sér alltaf eitthvað annað að gera en læra tölfræði.

Ég hitti siggu í dag og við skelltum okkur aðeins í búðir og út að borða. Hún var að sýna mér geðsjúkan sófa sem hún er að fara kaupa sér, I love it!

Annars er voða lítið að frétta af mér þessa dagana. Bara endalaus próflestur sem virðist engan enda ætla að taka :( Fyrsta jólaprófið mitt er 10. des og það síðasta 21.des. Það er hræðilegt að vera búin svona seint í prófum en svona er þetta bara í háskólanum.

Ég ætla ekkert að hafa þetta mikið lengra en enda þetta með nokkrum fyndum staðreyndum um karla og konur sem ég fann á síðunni hennar Sigrúnar .

Konur hafa meðfætt gen sem gerir þeim kleift að muna fyrirhafnarlaust afmælisdaga, heimboð og hátíðleg tækifæri.

Karlmenn hafa enga skoðun á gluggatjöldum.

Þegar einhver kaupir sér nýjan bíl spyrja karlmenn um tegundina, konur vilja fá að vita hvernig hann er á litinn.

Ef þú spyrð konu til vegar þá segir hún þér hvaða verslanir eru á leiðinni, ef þú spyrð karlmenn til vegar þá miðar hann við krárnar.

Konur setja hluti við neðsta þrepið í stiganum til að fara með þá upp í næstu ferð. Karlmenn klofa yfir þá þangað til þeim er sagt að taka þá með sér upp.

Þegar klukkan er orðin tvö eftir miðnætti finnst karlmönnum tilvalið að fara að sofa. Þegar klukkan er orðin tvö eftir miðnætti finnst konum tilvalið að fara að ræða saman um hvernig sambandið sé að þróast.

Karlmenn geta ekið bíl án þess að glápa á sjálfan sig í speglinum.

Konur hafa hæfileika til að láta karlmenn halda að þeir ráði einhverju.

Þegar karlmenn vantar eitthvað biðja þeir um það. Þegar konur vantar eitthvað minnast þær á eitthvað skylt efni og bíða eftir réttu svari.

Karlmenn vilja fá lófatak fyrir að taka úr uppþvottavélinni.

Karlmenn nota orðið ?ég? þegar þeir ættu að segja ?við?. Konur segja ?við? þegar þær ættu að segja ?ég?.

Karlmenn geta sofið þótt hundurinn gelti, barnið gráti eða dyrabjallan hringi.

Konur gætu aldrei fundið upp vopn eða morðtól. Þær mundu finna upp vopn sem léti óvininn fá svo mikla sektarkennd að hann gæfist upp og bæðist afsökunar.

Karlmenn geta ekki samtímis horft á sjónvarpið og talað við konu sína.

Konur geta munað hvernig þær voru klæddar ákveðinn dag fyrir ári síðan, karlmenn muna ekki hvernig þeir voru klæddir í gær nema kíkja á fatahrúguna á gólfinu við rúmstokkinn.

Konur vita hvað á að gera þegar einhver brestur í grát. Karlmenn þurfa allt í einu að skreppa frá.

Karlmenn geta horft á heila kvikmynd án þess að spyrja: Hver er þetta? Hvað var að gerast? Hvað gerir þessi?

Konur fara saman á klósettið. Karlmenn talast ekki við inni á salerninum.

Konum finnst ekki kynæsandi að ímynda sér tvo karlmenn láta vel hvor að öðrum.

Konum er það meðfætt að taka hluti persónulega.

Karlmenn hafa gen sem gerir þeim kleift að halda sjónvarpsfjarstýringunni eins fast og í skrúfstykki meðan þeir liggja í sófanum og góna á innanverð augnlok sín.

Konum finnst skynsamlegt að láta sjónvarpsfjarstýringuna liggja ofan á sjónvarpinu.

Konur horfa á kynþokkafullan karlmann án þess að eftir því sé tekið, karlmenn glápa á fallegar konur og allir taka eftir því.